一封港媽寫俾大眾嘅信～搭港鐵嘅辛酸

做人媽媽甚艱難，係香港做一個媽媽就更辛苦！

我係一個媽媽，有一個仔仔，由於居住地方需要步行差唔多20分鐘嘅路程先可以到港鐵站，再加上過程中需要上落斜坡，我多數都會推bb車出去搭港鐵，而呢一封信亦都係因為咁而寫：

有時我都好明白，繁忙時間真係好多人好逼，人人都想快d去到目的地，但係唔該你見到有bb車就唔好再逼入嚟啦好嘛？

大人俾你撞一撞都痛，更何況你成個人挨落架bb車？

小朋友唔舒服大叫大喊，又俾人側目，做人媽媽真係無限咁無奈！

其實有冇諗過我地為左上車可能已經等左幾班車？

你介唔介意都等下班車呢？其實香港地鐵好快架咋，繁忙時間2-3分鐘就有一班架啦！

仲有一點我真係好討厭！

唔知有冇人同我一樣每次等地鐵月台上大堂嘅升降機等到燥？

永遠有一堆人唔排隊，一開門就打尖衝入去，又或者手腳健全嘅人逼住哂d位？

轉車站（例如：金鐘、太子）因為有兩層月台，夾係中間果層真係分分鐘等10幾分鐘先入到去！

唔排隊打尖固然可惡，但我更不憤果d貪方便而搭升降機嘅人，你行多兩步去搭扶手電梯會斷腳咩？

我地推住bb車係真係有需要搭架，我夠情願行多兩步路唔駛等啦，但危險嘛！（老實講，有d地方冇升降機都係逼住你用扶手電梯，路人都係會嫌棄你阻掟）

當然你可以收起架bb車，一手拎車一手拖仔啦，但有時仲要手抽一袋，揹一個背囊，真係唔係個個媽媽做到架！

最後就係出閘機，呢樣我觀察左好耐，到底呢個人點解唔用隔離嘅轉閘機，係都要用專門俾bb車同輪椅用嘅闊閘機呢？

我好想同香港大眾講，一個港鐵站，大部份都只有兩個闊閘機，一個係入口，一個係出口（唔好問我點解，好多時就係set到只可以出不能夠入）

我推住bb車係真係必須要使用闊閘機，如果你只係為左方便，或者只係唔想郁手轉個閘，可以麻煩你，讓番部闊閘機俾有需要嘅人嘛？

當然，香港都有好多熱心人，平時見一個媽媽帶小朋友出街，好多時都會幫手叫人讓開d行入d，上港鐵又會幫手托一托車，但仲有為數不少嘅人，佢地嘅行為真係令到媽媽們好困擾，希望大家都可以互相提點下，令到香港社會更加和諧融洽。