桃。玩 變變變！Move生物體驗展

係日本銷售量高達250萬冊嘅學習圖鑑「動態圖鑑MOVE」首創「活、動」形式打造最新型態教育型體驗展覽「變變變！MOVE生物體驗展」，更加係日本同台灣創下50萬入場人次紀錄

第三站終於嚟到香港九龍灣MegaBox喇，今日就同阿桃率先為大家介紹！

場內劃分成6大主題教學區，透過遊戲、文字圖像同變裝探索，俾小朋友了解更多自然生態冷知識

一入場首先會見到呢個巨型圖鑑，係介紹草食性同肉食性動物嘅便便，仲真係會見到「展品」！
呢度亦都係我發現最多小朋友睇嘅展板，睇嚟年代變遷，但小朋友對「呢類野」都係永遠掛起口邊！

當然全場仲有好多展板介紹不同動物啦！

除左圖畫，仲有互動展板，有d仲有小影片睇，幫助小朋友加深認識

仲有呢個模仿吼猴保護家園嘅遊戲，阿桃攞正牌不停大叫，但記得要㩒實綠色鍵叫先計數架

講到大叫，阿桃表示冇難道，大成功！

之後就到重頭戲之一，生存海洋

係呢度要提醒大家，記得要著襪先可以入場玩呀，同埋需要除低手錶、戒指等飾物，避免整花滑梯，企鵝帽都只係影相用，上滑梯前要除番架！

換好衫影完影之後就可以行上去，指導員會簡單同小朋友講解點解企鵝會用肚腩去滑行

之後小朋友/大朋友就可以一齊開心玩喇！（冇錯，大人都玩得架！）

行過隔離就到另一個扮演地點小小花園

工人人員會幫小朋友著好團子蟲嘅服飾
雖然桃媽好怕蟲，但呢隻團子桃超級咁可愛！

而且做工真係好仔細，蟲蟲腳都有做埋出嚟

導師會扮演想食團子蟲嘅動物，吹響哨子後，就會拎槌仔敲下已經匿埋好嘅團子蟲

等到獵物一走，團子蟲就會即刻出番嚟逃生喇

神奇叢林到底係玩咩架呢？
 
原來係扮演敏捷度極高嘅雙冠蜥蜴，以輕盈身軀快速橫過特製水面，感受平衡性同靈敏度
 
以為好簡單，其實每踩一下再抬腳都需要更多力量，係熱帶雨林生存真係唔容易呀！

最後一個扮演遊戲就係奇蹟草原

小朋友扮演獅子去捕食斑馬，除左要留意住斑馬有冇望到你之外，仲考驗你嘅身手同策略，適時要匿埋好，等斑馬唔會發現到你

每人有5次機會，小獅子們做盡辦法去㩒紅色鍵獲勝啦！

完成左仲可以同捕獲到嘅獵物影相（？）

而最後一個活動就係「生物特徵」
特別展出唔同生物嘅特徵部位，好似水牛嘅角、椰子蟹嘅螯

蝴蝶翅膀、海龜嘅殼，除左可以俾大家打卡影相，仲可以俾小朋友親身扮演唔同嘅動物，從而體驗動物特徵對佢地生存嘅重要性

「變變變！MOVE生物體驗展」香港站
日期：2019年7月1日至10月20日
時間：上午10時至晚上8時 - 每2小時為1節(7月及8月份)
地點：九龍灣宏照道38號MegaBox L13

立即購票👉http://bit.ly/2KC78Tb

變變變！Move 生物體驗展．香港站
#變變變MOVE生物體驗展香港站 #6大主題互動區 #活學生態環境 #寓學於玩 #MegaBoxL13